Toponimo nafarra da, Ergoienako udalerrikoa. Andremaintza toponimoaren lekuko zaharrena 1699. urteko Andremaintza litzateke, bitxia idazkera, akatsa gertatu ez bada. Gerokoak dira, 1893. urteko hiru lekuko, guztiak ezberdinak: Andremaincea, Andremaniza eta Andremaricea. Egun, Andremaintza da. Lekukoak aztertu eta badirudi hainbat lekukotan aa > ea disimilazioa gertatu dela, artikuluaren eransketa zela eta: Andremaintza + -a > Andremaintzea.
Androtoponimoa litzateke, hau da, antroponimo batez osatutako leku izena. A. Irigoienek, bere Pertsona izenak euskaraz liburuan, egokiena den antroponimoa jarri zuen, Erdi Aroko lekukoak eskainiz:
"4.16. ANDRE MANCIA, emakume-izena: domna Andre Mancia, (1110-1119, Doc. Artajoneses, dok. 60). Ikus MAYNÇIA hirugarren zerrendan."
Lekuko bakarra bada, baina argia. Mantzia > Maintzia bilakaera izan zen. Toponimoa sortu zenerako beharbada *Andremantzia zen edo *Andremaintzia, baina idatziz ipini zutenean bigarren /i/ galdua zuen eta Andremaintza geratu zen, egun bezala.
Beraz, antroponimo elkartu bat zegoen toponimo honetan, Andransakorta toponimoan bezala.
No hay comentarios:
Publicar un comentario